DYCI Blue Ocean 10 pinarangalan sa World Food Factor Festival

LUNGSOD NG MALOLOS – Tumanggap ng ikatlong karangalan sa isa sa 12 kategorya ng First Lego League (FLL) Food Factor World Festival na isinagawa sa Estados Unidos ang koponang Bulakenyo na kumatawan sa bansa.

Ang ikatlong karangalan sa Project Presentation category ng FLL ay iniuwi ng koponang Blue Ocean 10 ng Dr. Yanga’s Colleges Incorporated  (DYCI) na naka-base sa Barangay Wakas Bocaue, Bulacan noong nakaraang linggo.

Ito ay sa pamamagitan ng kanilang nilikhang anti-botcha machine o Meat Anti-Germ Inspection Solution 2.0 (Magis 2.0) na may kakayahang matukoy ang sirang karne.

Bilang isa sa 12 kategorya ng FLL, ang project presentation ay nilahukan ng mga 40 koponan mula sa Canada at Estados Unidos, at dagdag pang 40 koponan mula sa Australia, Europa, Asia, Africa, at South America.

“We didn’t win the championship, but we made it in the major category,” ani Michael Yanga, ang director ng DYCI.

Ang unang dalawang koponang nagwagi sa project presentation category ay ang Mindstorm Masters at Team Nexus na kapwa nagmula sa Estados Unidos.

Ayon kay Yanga, ang karangalang tinanggap ng DYI Blue Ocean 10 ay isang malinaw na pagkilala sa kakayahan ng mga Pilipino.

Ikinuwento niya na sa oras ng paligsahan, ipinakita ng DYCI Blue Ocean 10 ang kakayahan ng “Magis 2.0” sa pagtukoy sa sirang karne.

Ito at tinagurian din nila bilang anti-botcha machine dahil sa ito ay nilikha ng mga kabataan bilang tugon sa lumalalang kaso ng botchang karne sa kalakhang Maynila.

Ayon kay Bery Cruz, assistant coach ng koponan, ang karangalang tinanggap ng Blue Ocean 10 ay makahulugan dahil ito ang unang pagkakataon na lumahok ang bansa sa nasabing paligsahan.

Bukod dito, ang Pilipinas ang nag-iisang bansa sa South East Asia na naka-sungkit ng karangalan.

Sinabi ni Cruz na ang FLL ay kakaiba sa World Robot Olympiad na kanilang nilahukan sa mga nagdaang taon.

“The FLL is different from the WRO,” aniya patungkol sa pagligsahan ng mga robot kung saan ay tinanghal na kampeon noong 2010 ang koponan ng DYCI.

Ang Blue Ocean 10 ay pinangunahan ni Coach Romyr Gimeno, kasama ang mga mag-aaral na sina Gladys Leigh Malana, Trisha Carmela Santos, Keight dela Cruz, Michelle Alcanar, Lady Alein Goleng, Ramikert Del Prado, Dave Adrian Bien, Tim Jhalmar Fabillon, Jules Martin Agsaoay, at Jonathan Alejandro.

Ang FLL Food Factor World Festival ay natapos noong Abril 30 kung saan ay nagwagi bilang kampeon ang koponang Falcons ng Japan kasunod ang Blue Gear Ticks mula sa Estados Unidos at ang NXTremers mula sa India.

PAGHAHANDA SA K+12:Kapitolyo, Malolos magkaagapay sa pagtatayo ng mga silid-aralan

By Dino Balabo

MALOLOS – Bilang punong guro ng Malolos Central School sa maraming taon, hindi na mabilang ni Reynaldo Diaz ang mga hamon at problemang sinuong.

At habang nalalapit naman ang susunod na pasukan, mas maraming hamon ang hinaharap ni Diaz.

Kabilang dito ay ang paghahanda sa implementasyon ng Kindergarden Plus 12 Program (K+12) at ang pagbubukas ng programang pangsekundarya sa kanyang paaralan na sa Hunyo ay tatawaging Malolos City Integrated School (MCIS).

Ngunit katulad ng iba pang punong guro sa mga pampublikong paaralan sa lalawigan, ang mga problema ay hindi haharaping mag-isa ni Diaz. Ito ay dahil sa ayudang hatid ng mga pamahalaang lokal sa lalawigan.

“Since 2010, we initiated an aggressive school building construction program because we know student population will always outnumber classrooms and other facilities,” ani Mayor Christian Natividad ng lungsod na ito na itinuturing na sentro ng edukasyon sa lalawigan.

Ayon kay Natividad, ang kanyang programa sa konstruksyon ng mga silid aralan ay doble ang talim.

Una, ito ay nakadisenyo upang mabawasan ang kakulangan sa mga silid-aralan sa mga pampublikong paaralan sa lungsod; at ikalawa, layunin nito na mapababa ang bilang ng mga mag-aaral sa high school na hindi nagpapatuloy o hindi nakakatapos.

Batay sa tala ng Department of Education (DepEd) noong 2010, ang Malolos ay pang-apat sa mga lungsod o bayan sa bansa na may pinamakataas na drop-out rate sa high school.

“It is ironic, Malolos City is the academic center of Bulacan and we have three prestigious universities in the city along with 47 other colleges, but our high school students are dropping out,” ani ng alkalde.

Ang mga pamantasang kanyang tinutukoy ay ang Bulacan State University (BulSU), La Consolacion University of the Philippines (LaCUP), at ang Centro Escolar University—Malolos Campus.

Ayon kay Natividad, ang mataas na drop-out rate ng mga mag-aaral sa high school sa lungsod na ito ay nakakabahala dahil ito ay magbubunga ng mga kabataang kapos sa kakayahan.

Bilang tugon sa nasabing kalagayan, pinangunahan ni Natividad ang pagbubukas ng mga paaralang sekundarya sa mga barangay ng Bangkal, Santisima Trinidad, Mojon, at Bungahan. Isa pa ang planong itayo sa Barangay Bulihan.

“We will build more together with the provincial government.  Our plan is to establish a high school for every three barangays,” aniya at nilinaw na hindi sila nagtayo ng mga silid aralan sa lahat ng nabanggit na barangay.

Sa halip ay nagrenta sila ng gusali upang mapasimulan agad ang programa.

Hinggil naman sa mga paaralang pang-elementarya, sinabi ni Natividad na mula noong 2010 ay nakapagtayo na sila ng lima, kaya’t lima na lamang sa 49 barangay ng lungsod na ito ang walang paaralang elementarya.

Ayon sa alkalde, ang pagtatayo ng mga paaralang elementarya sa bawat barangay ay bahagi ng kanilang paghahanda sa pagpapatupad ng K+12 sa Hunyo.

“Some barangays may not have their school building by June, but we are moving forward and we thank the provincial government for assistance,” aniya.

Una rito, nilagdaan nina Gob. Wilhelmino Alvarado at Education Secretary Armin Luistro ang isang memorandum of agreement (MOA) para sa konstrukyon ng karagdagang 1,982 silid aralan sa lalawigan.

Ang konstruksyon, ayon kay Luistro ay inaasahang matatapos sa 2013.

Ito ay pinondohan ng Deped at kapitolyo batay sa iskemang “50-50” kung saan ang DepEd ay magbibigay ng P800-milyon para sa konstruksyon ng mga silid aralan at iyon naman ay tutumbasan ng katulad na halaga ng kapitolyo. 

Dahil dito, tinatayang aabot sa P1.6-bilyon ang gugugulin ng DepEd at kapitolyo para sa mga itatayong silid aralan sa lalawigan.

Para sa mga punong guro ng mga paaralang pampubliko sa lalawigan, ang pagtatambal ng DepEd at kapitolyo ay isang magandang kaganapan.

Sinabi niya na siya ay umaasa na madagdagan pa ang mga walong silid aralan na tinatayo sa MCIS, partikular na kung ito ay mapapabilang sa mga paaralang tutukuyin ng DepEd at kapitolyo.

Simple ang dahilan sa pagnanais ni Diaz na madagdagan pa ang silid aralan sa MCIS.

Ito ay dahil na rin sa umabot na sa higit 500 mag-aaral ang naunang nagpatala upang mag-aral ng high school sa MCIS sa darating na Hunyo.

Donasyon ni dating Embahador Tantoco magagamit na sa Hunyo

Iniaaabot ni dating Embahador Bienvenido Tantoco Sr., (ikatlo mula sa kaliwa) ang sobre na naglalaman ng tsekeng nagkakahalaga ng P400,000 kay Reynaldo Diaz, ang punong guro ng Malolos Integrated School bilang donasyon.  Ang P181,000 ng halaga ay regalo ng  Sycip,Gorres and Velayo and Associates para sa ika-91 kaarawan ng dating embahador.  Kasama sa larawan sina (mula sa kaliwa) Lydia Reyes ng Klub Bulakenyo, mga anak ng embahador na sina Nedy Tantoco at Marites Tantoco-Enriquez, at ang apo na si Donnie Tantoco na siyang pangulo ng Rustan's Supercenter. (Dino Balabo)

By Dino Balabo

LUNGSOD NG MALOLOS – Magagamit na ng mga mag-aaral ng Malolos Integrated School (MIS) ang mga donasyon ni Ambassador Bienvenido Tantoco Sr.

Ito ay ang 12 na flat screen television na may mga kasamang amplifier at sound system na magagamit sa science education program ng paaralang dati ay kilala sa tawag na Malolos Central School (MCS) na matatagpuan sa Barangay Sto. Rosario.

Ang pagbabago ng pangalan ng nasabing paaralan ay kaugnay ng pagbubukas ng klase para sa mag-aaral sa High School na magsisimula rin sa Hunyo.

“Naka-install napo yung 12 na LED television sets, at sa May 7 at ikakabit naman yung mga amplifier,” ani Reynaldo Diaz, ang punong guro ng MIS.

Ayon kay Diaz, malaking tulong sa mga guro at mag-aaral ang mga LED TV sets dahil sa magagamit nila ito sa mga video presentation at iba pang araling naka-rekord sa video.

Binigyang diin pa niya na ang mga LED TV sets na ipinagkaloob ni Tantoco ay hindi una, dahil sa mga nagdaang panahon ay pinangunahan din ng dating embahador ang pagpapatayo ng mga gusali sa nasabing paaralan bukod sa pagpapakumpuni ng ilan at pagbibigay ng mga dagdag na libro para sa silid aklatan.

“Priceless ang kontribusyon ni Ambassador Tantoco sa aming paaralan, at bukod pa diyan, mahigit 100 mag-aaral ang kasali sa kanyang sariling scholarship program,” ani Diaz.

Matatandaan na noong Abril 2, kasama ang pamilya at mga kaibigan inihatid ni dating Embahador Tantoco sa MIS ang tseke na nagkakahalaga ng P400,000 bilang donasyon sa paaralan.

Ayon sa dating embahador, ang kalahati ng halagang kanyang ipinagkaloob ay regalo ng Sycip, Gorres at Velayo (SGV) Accounting Office para sa kanyang ika-91 kaarawan noong Abril 7.

“I told them, I will match their gift and will give it to my favorite school,” ani Tantoco sa kanyang maikling pananalita.

Ngunit ang nasabing halaga ay hindi sapat para sa 12 LED TV na may amplifier at sound system na kailangan ng paaralan.

Dahil dito, ipinangako ni Tantoco na dagdagan pa niya ang kulang sa pamamagitan ng donasyon ng kanyang mga kaibigan na bumubuo sa Klub Bulakenyo at pamilya na nagmamay-ari ng Rustan’s Supermarket.

Sa ekslusibong panayam sa dating embahador, sinabi niya na hindi niya makakalimutan ang kanyang mga karanasan sa Malolos Central School kung saan siya nagtapos ng elementarya.